الأربعاء، يونيو 17، 2009



توتا سافرت مصر امبارح عشان تحضر فرح اختها عقبال عندكم جميعا وسابتنى هنا لوحدى .. هيا سافرت من هنا وكان فى دماغى ان امى مسافره وهعمل حفله .. بس فجأه اول ماصحيت من النوم لقيت نفسى شبه العصفور ده . مخضوض ومتنحكش ومحتاس ومتنيل على عينه مش عارف يعمل حاجه ولا عارف حتى يطير .. ماشى يا توتا ..

بعد ماتوتا سافرت رحت الشغل ورجعت البيت وقلت هدخل المطبخ وازبط نفسى . دخلت البيت من هنا وعملت اللى قالتلى عليه توتا قبل متسافر.. احط الشوز فى الجزامه واقفل الكرسى بتاع الجزامه واعلق الهدوم على الشماعه او الدولاب وأأكل السمك ومابهدلش البيت ولا اكركب المطبخ واغسل المواعين اول بأول . المهم عملت اللى قدرت عليه ودخلت على المطبخ عشان اعمل الغدا بمزاااااااج .

دخلت ... طلعت بورجر من الفريزر عشان استسهل العمايل وغسلت الاطباق اللى هاكل فيها وفى نص الغسيل فى وسط الصابون الميه قطعت . اتصلت بالبواب قالى الميه هتيجى بكره .. قلت خليك ريلاكس وتعامل مع الهدف بصدر رحب واغسل المواعين من الميه اللى محوشينها للظروف السعيده دى . غسلت المواعين . البورجر فك وبقى جاهز للقلى . حطيته على النار ورحت اشغل مزيكا عشان استكيف واستمخ فى المطبخ . شغلت كوكتيل روك على بلوز على كنترى كوكتيل جامد كده بعمل فيه بقالى سنين . رجعت للمطبخ وبشوف البورجر لقيته لسه ماستواش ولا فيه ريحه ولا عامل اى ريأكشن حتى بصيت على النار ملقيتش نار ..؟؟ ايه ؟؟ الانبوبه فضيت ؟؟ آه يا حوستى السوده يانا يامه ... لا ميه ولا غاز .... بس على مين لاهزيمه ولا استسلام .. عندى بوتاجاز صغير انبوبه كده صغيره بعين واحده برضه للظروف السعيده اللى زى دى قلت اشطه مش عايز اكتر من كده المهم دورت عليه فى مكانه ملقيتهوش تحت الحوض قلبت المطبخ مش لاقيه .. قلبت الصاله مش لاقيه طبعا مش فى اوضة النوم ولا فى الليفنج .. رجعت المطبخ وانا وشى بيجيب تلاتين لون فى بعض بصيت تانى تحت الحوض لقيت جراكن ميه قلت اشيلهم كده .. فعلا لقيت البوتاجاز وراهم المهم طلعته وشغلته وحطيت عليه البورجر وانا مخى بيغلى . اصلها لما تأفش بتأفش من كل حاجه .. بعد ماخلصت البورجر افتكرت انى مجبتش كايزر للسندوتشات .. يادى النيله بأه المهم لبست هدومى وطلعت اشترى العيش ملقيتش عند البقال اللى قدامى .. لسه مصمم برضه . رحت لبقال ابعد شويه وجبت العيش ورجعت لقيت البورجر طبعا بقى ساقع المهم سخنته شويه وعملت السندوتشات وطلعت البيبسى والكاتشب والمايونيز ورحت على الليفنج أدام التلفزيون حطيت الكاتشب وجيت احط المايونيز لقيته جامد شويه مش راضى ينزل من العلبه بتاعته .. فتحت الغطا ورجيته مرضيش ينزل .. قلت ارجه جامد شويه .. رجيته جامد وقد كان ما كان واللى بتفكرو فيه حصل .. اتغرقت مايونيز بعيد عنكم .. بقيت عتلم بطعم المايونيز .. طب اعمل ايه ؟؟ استحمى الاول ؟؟ مفيش ميه . لالا انا هاكل الاول والغوص وبعدها اتصرف وربنا يستر .. كلت الحمد لله وشربت البيبسى وابتديت افوق من اللى انا فيه واهدا من اللى حصلى فى عمايل الاكل . المهم قمت اودى الاطباق المطبخ وبضرب بعينى فى الصاله لقيت الصاله بقت زى الزفت والمطبخ كمان والليفنج طبعا .. البيت كله بقى مكركب والمواعين مش نضيفه والدنيا اتبهدلت فى ساعتين زمن وكل توصيات ونصايح توتا جت فى دماغى . وقفت مبلم ومتنح شويه وادركت تماما انى فى مشكله جامده والميه مقطوعه .. ولازم ارجع كل حاجه زى الاول .. وابتدى مشوار النضافه .. اصب لنفسى ميه من الجراكن واغسل المواعين وانضف الارض وادخل استحمى واروق الصاله . آدى كمان ساعتين . بعد ماخلصت لقيت نفسى جعان طبعا .. احترمت نفسى وطلعت كلت برا فى المطعم بكرامتى
آدى اخرة اللى يسيب مراته تسافر ويقعد هوا لوحده .

هناك 51 تعليقًا:

عاشقه الرومانسيه يقول...

اول تعليق
ل
عاشقه الرومانسيه
واااااااااااااو

عاشقه الرومانسيه يقول...

علشان تبقى تعرف قيمة المودام
وماتزعلهاش
وبلاش تخليها تسافر لوحدها
ابقى روح معاها

وابقى قولها انك احتست من غيرها
مش عيب على فكره
بس هتقدر لك اعترافك بدورها فى حياتك

حاجات بسيطه بس بتعجب الستات
(;


وادى اخره اللى ياكل بورجر لوحده

Bola 7elmi يقول...

ههههههههههه ياااااه
كل دا عشان تعمل برجر ..
يااااه لا تعبت حقيقي تعبت
بس الاكل طلع وااااو .. تسلم ايدك

اه يا توتا .. والله المفروض تكافئها
عشان تعرف انها بتتعب :)
وتعبك راحه بالنسبه لها

بس ايه رأيك بزمتك مش حربت حاجه جديده
كان يوم حاااااااافل :)


اتفضل سنكرس :)



وسلامي ليك :)

ميرام يقول...

ههههههههه
انا صعبان عليا هيا لما ترجع وتلاقي كمية كوارث في البيت
(:
نيجي للصورة
مش عارفه ليه حسيته (كتكوت) بيستهبل
(:
(:
نظرة شاعرية قوي مش كدة (:
بجد ده اول انطباع جالي (:
هروح أبص بصة تانيه ..
يمكن أشوفه بنظرة انسانية (: (:
بانتظار الجديد
تحيـــــاتي

أبو العريف يقول...

باشا
اخبارك

ربنا يرجعها بالسلامه وتنجدك من اللي انت فيه
فكرتني بالبوتيتوس ( البطاطس يعني )

انا بقي استسلمت من اولها ومقضيها مطاعم لما خلاص قربت انفجر


ايه الصوره العجيبه دي
بتفكرني بواحد صاحبي مش عارف ليه

شكلك تعرفه يا ريس

غير معرف يقول...

بس عارف
بعد كده هتفتكر اليوم ده وتقعد تضحك جامد اوي.. من كل قلبك..
ودي أهم حاجه..

يلا روح روق البيت بقي بدل مانت قاعد عالبلوج :))

بس العصفور دي مش طبيعي
شكله ضعيف.. عيان.. تحس كده ان جناحه فيه حاجه ومش عارف يطير....

ساره يقول...

عادي يا محمد ... الرجل ما يعرف يتصرف من غير ست البيت :)
انت لو تشوف اخوي والحوسه اللي يعملها بس عشان يسوي كوبيه شاي

المهم ان شاء ترجع توتا بالسلامه وتنور بيتها .. والله يعينها على البلاي اللي عملتها لها فى الشقه

حاجات جوايا يقول...

هههههههههههههههه
يا عينى
هههههههههههههههه بجد متخيلة الموقف وقاعدة اضحك
شر البلية ما يضحك فعلا ههههههههههه

عشان بس الرجالة يقروا ويعترفوا ويبصموا بالعشرة على قيمة المراة فى حياتهم

بس الجميل انك ميأستش .. وحاولت للآخر وكمان نضفت .. لا بجد بجد برافو .. شابو على كده

ربنا يرجعلك توتا بالسلامة ان شاء الله
وابقى حاول تفضى نفسك وتنزل معاها .. المرة دى ربنا ستر المرة الجاية الله اعلم ههههههه

بس تعرف حسيت الصورة اكتر بعد قراءة البوست .. بجد معبرة فعلااااااا

دمت مبدعا اخى الفاضل

ساره يقول...

نسيت اعلق على الصوره
شكل العصفور لسه طالع من خناقه
وهو واقف ياخذ نفسه عدستك كانت بالمرصاد :)

tota يقول...

وحشتني قوي قوي ياحياتي......

وانا بجد أسفة اني سافرت وسبتك لواحدك
مش هكررها تاني مش علشان البهدله اللي حصلت في البيت بس علشان انا كمان حسيت بالوحده وانا بعيد عنك مش انت بس اللي بتقول من غيري اه ياغربتي وانا كمان والله وانت عارف كده ياعتلم عموما ياحبيبي مش تزعل مني وانشاء الله ارجع بسرعه وربنا يخليك ليا وتبهدل على طول البيت ياحبيبي

هتوحشني كتير كتير لغاية اما اجي
وخلي بالك على نفسك وعلى السمك ياعتلم

وبوسااااااااااااااااااااااات كتيره ليك

طـائر الليــل الحـزين يقول...

انتوا كده يا رجالة
مش بتعترفوا بقيمة الست الا لما تتبهدلوا
الصورة جميلة قوى على فكرة
تحياااااااااتى

محمد عتلم يقول...

عاشقة الرومانسيه .... دودو
والله العظيم عارف قيمتها وبضرب نفسى انى سمعت كلامها وسفرتها اساسا
بس اعمل ايه عندى شغل كتير اوى الشهر ده وكمان عندى خمس سفريات ورا بعض
ومش هاكل بورجر تانى يا دودو
منورانى

محمد عتلم يقول...

بولا حلمى
والله العظيم تعبت اوى اوى واليوم كان مليء بالاحداث
وبعدين متتريقيش على البورجر بتاعى لوسمحتى .. انا طباخ جامد والله وبعمل اكلات تحفه بس انا كنت باستسهل يومها
اما ل لو كنت باطبخ بأه كان ايه اللى حصل ؟؟
تعالى يا توتا شوفى اللى جرالى
تحياتى ليكى يا بولا ومردودالك فى الافراح

محمد عتلم يقول...

ميرام
لالا الكتكوت مكانش بيستهبل ولا حاجه
ده فعلا كان طالع عينه من الغسيل والتنضيف ومكانش لسه خد دش وكان مخضوض من الموقف اللى اتحط فيه
شكرا ليكى

محمد عتلم يقول...

ابو العريف
انا معرفش صاحبك ده بس شكله كان متمرمط هوا كمان
وبعدين مش احنا عارفين ان الحياه يوم ليك ويوم عليك ؟ اهوا اليوم ده من الايام اللى عليا يا معلمعامل زى يوم البطاطس بتاعتك كده
ويجعله عامر

محمد عتلم يقول...

هاجر
طبعا يوم مضحك واكيد هفتكره كتير اوى
بس العصفور ده مشكلته انه فعلا صغير ومخضوض عشان هوا بص لقى نفسه ماشى على الحديده دى ومتشعلق ومش عارف يطير ولا يرجع ولا يروح اى حته . بص لقى نفسه لايص .. شبهى اول ما توتا مشيت
وعلى فكره انا نضفت البيت خلاص وبقى فله

محمد عتلم يقول...

ساره
طبعا حوسه وصجه ولجه بعد
الحياه زى النيله طبعا بدون الستات
ولا نقدر نستغنى عنهم
طبعا اخوكى مش متجوز صح ؟
ادعيلى ان الايام دى تعدى على خير
انا مش بعيد افرقع العماره او انسف الشارع مثلا من كتر الكوارث اللى هتحصل
تحياتى ليكى

محمد عتلم يقول...

حاجات جوايا .... سالى
شكلك فرحانه فيا يا سالى .. كده .. ماااااشى بكره تندم يا جمييييييييل
اه يا شماتة ابله ظاظا فيا

شفتى الحوسه اللى انا فيها يا سالى ؟
بس بجد احنا منقدرش نستغنى عنكم والله العظيم . فعلا انتم مهمين جدا جدا فى حياة اى راجل . سيبك من الاكل والتنضيف والغسيل والكلام الفارغ ده انتو مهمين نفسيا وعاطفيا وعقليا واجتماعيا وتربويا وكل حاجه فى الدنيا
تحياتى ليكى

محمد عتلم يقول...

ساره
العصفور واكل علقه عمره فى حياته ماكلها قبل كدا
مضروب ضرب مبرح

محمد عتلم يقول...

توتا
اعمل فيكى ايه بس ؟؟
كده تسيبينى فجأه عشان اصحى فجأه واتعب من المفاجأه ؟؟ مااااااشى
عموما حسابنا بعدين ..
انتى وحشتينى جدا والحياه كلها من غيرك ملهاش طعم والله . بس اوعدك انى هحاول انى احافظ على البيت على أد ماقدر بس ميمنعش يعنى انك لما تيجى تلاقيلك مصيبتين تلاته .. اظن من حقى طبعا
المهم خلصى اللى وراكى وحاولى تستمتعى فى مصر على أد ما تقدرى وانجوى بوقتك على الاخر عشان هطلعه عليكى وز وز بعد كده ..

محمد عتلم يقول...

طائر الليل الحزين
ازيك .. عامله ايه ؟
شفتينى وانا متبهدل ؟
طبعا فرحانه فيا زى باقى البنات .. دا انتو مابتصدقو تفرحو فى الرجاله
انتى منورانى دايما ومرسى على الزياره

أحــوال الهـوي يقول...

اخي العزيز
اشكر سؤالك
و انتظر التواصل معك

تحياتي

MǿиY El-Shreef يقول...

اولا اولا

انت عايش فين اصلا :D

ثانيا مبرووووك لفرح اخت توتا

ثالثا بقى

ابقى خد العظه والعبره هيهيهيهيهي

انا مش فرحانه فيك والله

انا بس رايقه حبتين :D

ربنا يخليهالك ومايحوجك لغيرها قادر ياكريم ههههههههههه

محمد عتلم يقول...

احوال الهوى
اقل واجب يا احوال الهوى

محمد عتلم يقول...

مونى الشريف
اولا اولا انا عايش فى جده
ثانيا الله يبارك فيكى يا مونى وعقبالك
وبعدين شكلك فرحانه فيا اوى ... متنكريش يا شريره
عموما انا حرمت خلاص ومش هكررها تانى
وتحياتى ليكى جدا

اسماء عوني يقول...

هههههههههههههههههههههههه
معلش يا سيدي استحمل عشان تبقي تقدر قيمتها
وبعدين ما بدل ما تبهدل نفسك اطلب جاهز وجيب حد يعملك الشقه
وبعدين اصلا ازاي ماتعرفش تعمل لنفسك الاكل ولا تروق الشقه
ليه انت صغير :D
يالا حمد الله علي سلامتي بقي :P

لاسع افندى يقول...

انا حاسس بيك جدا.. بس انا غالبا باحترم نفسى وانام بدون اكل واحيانا بسكوت وفاكهه .....وطبعا هى علشان كانت غايبه عن اهلها فتره طويله بيستقبلوها بكل اصناف الاكل ..ناس تاكل وناس تغسل المواعين



تحياتى وربنا يرجعهالك بالسلامه

محمد عتلم يقول...

اسماء عونى
بتضحكى عليا ؟؟ ماااااااااشى
ليكى يوم يا ظالمه
بعدين انا طباخ شاطر جدا والله العظيم بس هيا لما بتنحس بتنحس على الاخر يا اسماء
حمدالله على السلامه

محمد عتلم يقول...

لاسع افندى
يعنى اول زياره ليك تيجى تحرق دمى وتعرفنى انها بتاكل كل اصناف الاكل وانا مش لاقى اللضا ؟؟
دانتا شرفت ونورت وسخنت وهديت النفوس يا عم لاسع
متشكرين يا عم الحج ومردودالك فى الافراح وليك يوم

سارة نجاتى يقول...

عشان تعرف قيمتها هههههههه
الصورة عجبتنى جدا بس لو تغير لون الخلفية شوية ممكن تنطق اكتر

بس جميلة بجد

محمد عتلم يقول...

ساره نجاتى
حتى انتى يا ساره فرحانه فيا ؟؟
منورانى والله

غير معرف يقول...

عجبتني أريحيتك في التعامل مع الفوضى التي تسببت بها أنت طبعاً:)
سبحان الله.. المرأة لا تجد نفسها إلا في البيت، وتطير من الفرح إن سمعت كلمة ثناء ممن تحب
لكن لدي سؤال:
بعيداً عن حبك لزوجتك.. أود معرفة هل لدورها في البيت حصة في حبك.. مثلا : لو كنتما تتقاسمان العمل في البيت - كالتنظيف والطبخ وو.. - هل كنت ستفتقدها؟

محمد عتلم يقول...

غير معروف
كن طريقة كلامك وسؤالك حاسس انك بنت مش ولد .
بس سواء كنت بنت او ولد انا اعرفك او لا اعرفك فأحب اقوللك على الجواب ..
فى كل الاحوال سواء نتقاسم المسؤليات او لانتقاسمها فأنا فعلا مفتقدها .. مع العلم انى كثيرا اساعدها واحيانا احضر العشا ومرات اقوم بعمل الغدا من الالف للياء .. يعنى طباخ شاطر . ومع ذلك لايمكن الاستغناء عنها . مش عشان المهام المنزليه ... عشان هي مهمه فى حياتى

sara rabie يقول...

يا مرك يا نعمممممممه

:D:D

محمد عتلم يقول...

ساره ربيع
مرار مابعده مرار والله يا ساره
انا خلاااااااااص بجيب بترول مش جاز

Unknown يقول...

لأ يافندم
ادى اخرة اللى
يفتكر ان زوجته بتعمل
كل شغل البيت ده بصباع رجلها
الصغير وعلى فمه كلمة واحدة :هو انتى
بتعملى ايه يعنى؟شوية طباق تتغسل !!!!

Unknown يقول...

إنما عتلم بالميونيز
ولا باكاتشب ده طعمه ايه؟
زى كنتاكى فرايد تشكن كده ؟
ههههههههههههههههههههههههههه
ربنا يخليك توتا وما تتحرموا من
بعض ابدا وتقر وتعترف بفضلها عليك
يافنـــــــــــــــــــــــــان

محمد عتلم يقول...

norahaty
شمتانه فيا ؟؟؟ ماشى ماشى
والله العظيم انا معترف بأهميتها فى حياتى مش عشان اغسيل والكلام ده .. دى مهمه فى كل حاجه والله
انما عتلم بالمايونيز بأه مقولكيش .... تحفه

ashraf يقول...

عتلم اخبارك اية مقولتليش لية وانا كنت بعتلك سندوتشات من عند حمدى

سبهللة يقول...

هههههههههههههههه
ضحكتنى اوى
الحمد لله انها جت منك
وشهد شاهد من أهلها
ابقى احكى لأصحابك عشان كل واحد يحط المودام فى نينى عينيه

ربنا يرجعالك بالسلامة ومايحرمكوش من بعض ابدا

سبهللة يقول...

معلش انا مكنتش اعرف انك خارج مصر
ممكن تقولى اسم البلد اللى انت عايش فيها
عايزة اعرف ايه البلد اللى بيتقطع فيها المية وبتيجى بكره غير مصر
عروستى؟؟

محمد عتلم يقول...

اشرف
هوا حمدى لسه شغال ؟
المره الجايه هتصل بيك ونروحله سوا

محمد عتلم يقول...

سبهلله
هوا انا لسه هحكى لاصحابى ؟
منا خلاص اتفضحت واللى كان كان وكل الناس والمدونين والاصدقاء والاقرباء والبلاد المجاوره الشقيق عرفو وفرحانين فيا ...
عموما انا فى جده

آه وكفى يقول...

هههههههههههههه
بالشفا يا استاذنا احنا شر لابد منه شوفت اديك ابتهدلت مانت كنت عامل حفلة من شوية ولا ياسلام على الألاااااااطه تقعدوا تقولوا ان احنا مش مهمين واحنا كل حاجة زي القطط تاكلوا وتنكروا

تحياتي لخفة ظلك

محمد عتلم يقول...

اه وكفى
أريتى فيها ؟؟ الحفله باظت خالص وبقت نيله
والله احنا من غيركم ولا نسوى

حبات التوت يقول...

ههههههههههههههه


يااااااااااااه عشان تعرف فايدة المدام

كل دة عشان سابتك ياعينى عليك

ربنا يخلهاللك ومش يحرمكوا من بعض

ابقى اقولها انك احتست من غيرها

YASSO يقول...

HHHHHHHHHHHHHHHHHHHHHHHHH
ANA QARERT ANI KOL YOUM A3DY 3NDK HNA MSH 3SHAN ALSOER BAS 3SHAN ALCOMMENTS BTA3ET AS7ABK DE...

MAFESH FAYDA LISA ZAI MA ANT YA 3TLM

ANY WAY MISR KANT NOS MENOWRA LAMA TOTA KANT HNA 3SHAN NOSAHA ALTANY KAN FE JIDDA.

W KANT BTR2E3 MN ALSOT 3SHAN ANT MSH M3AHA W LA 3REFNA NO5ROG WLA NRO7 FE 7ETA W ANA 2OLTELHA B3D KIDA MSH TENZIL MN GHERK LA2NHA KANT ZAI 2ELYTHA WALLHY ... ANT BARDO BTEDY LLDONYA 6A3M BAS AHO 3LA ALA2EL KANET TASBERA 3LA BAL MATENZELO ISA

LOVES U GUYS AND TAKE VERY GOOD CARE BOTH OF U. 

محمد عتلم يقول...

ويلا
اهلا بيكى يا ويلا فى المدونه الخزعبليه بتاعتى ..
وعموما انا فعلا احتست من غيرها جدا وقلتلها على كل حاجه طبعا
ومرسى جدا ليكى انك شرفتينى بزيارتك الجميله دى ويارب متكونش اخر مره
تحياتى ليكى

محمد عتلم يقول...

ياسو صديقتى الانتييييييييييييخ
شوفتى اللى جرى وحصل لصديقك ؟؟
ينفع تعملو فيا كده ؟
عموما انا لما هنزل مصر انشاءالله هيكون ليا معاكو تصرف تانى .. استحملو بأه عتلم لما ينزل مصر
وحياة جوز خالتى لاقلبهالكم عاليها واطيها يا ياسو بس انتو تلاحقو على اللى هيحصل
نياهاهاهاهاهاها

yasso يقول...

عتلم يا صديقى .... احب اقول ل حضرتك انك تشرف و تنور .... بس و حياة جوز خالتك بردوا ما تقدر تعمل حاجة
لا معايا و لا مع توتا
ولنا لقاااااااااااء
نييييياهاهاههاهاههاهاها

غير معرف يقول...

ههههههههههههههههههههههههههههههههههههههههههههههههه
ياعيني عليكم يارجاله غلابه منغيرنا
بس مش بتعترفوا بكده