الأحد، مايو 17، 2009

تاج تانى





















اولا صباح الخير ...

ثانيا .. جانى تاج غريب مريب عجيب من الأخت الصديقه سالى صاحبة مدونة حاجات جوايا . مش عارفله لا ملامح ولا مله ولا حتى عارف هوا بيتجاوب منين حته اصلا . قلت ياعتلم خد التاج وحطه فى التلاجه مؤقتا لا يحمض ولا يبوظ من الحر وابقى طلعه بعد يومين كده وسخنه فى الميكروويف وجاوب عليه . وعنها بأه ياجدعان . المهم انا قلت اجاوب بأه عليه عشان ميبقاش شكلى وحش لما التاج يبوظ عندى وتقولو عليا مهمل . انا هجاوب ويحصل زى مايحصل

من انت . وما اللذى تفعله هنا ؟

السؤال ده شبه سؤال كنت فين ساعة الحادسه ...

والله يا جدعان مابعمل حاجه هنا .. انا عموما واحد كان معدى بالصدفه البحته لقى حاجه اسمها بلوج قلت اما استكشف . منتو عارفين فضول المصورين.. المهم اتمشيت شويه عند كل واحد فى البلوج بتاعه لقيت اللى بيفضفض واللى بيعيط واللى بيضحك واللى بيشتم واللى بيستهبل واللى بيشتغل الناس واللى بيكتب حاجات حلوه . قلت يا واد ماتعمل حاجه جديده .. واتكلم وفضفض واضحك وعيط برضه بس بأسلوبك

اسرائيل تقصف كل جنوب ممكن بحثا عنك . اى شمال ستقصد ؟

ده سؤال يهودى ابن لزينه .. هعتبر ان اسرائيل دى مصطلح يطلق على اى حاجه وحشه انسان بأه , شغلانه , صفه , طبع , ظلم , اى حاجه وحشه هنقول ان اسمها اسرائيل .. طبعا هروح فى حته هاديه بعيد عن الدوشه ووجع الدماغ . هروح بلدنا اللى فى مصر

انت مكلف بحذف حرف من حروف اللغه العربيه . ايهما ستختار ولماذا ؟

انا هشيل 27 حرف بس واسيب حرف الالف علشان الناس كلها متتكلمش ولا تقول اى حاجه وحشه او حلوه .. آخرهم يشاورو لبعض ... مش احسن والنبى ؟؟

لو قدرت تدخل السجن (ياساتر) فما هى القضيه التى تتمنى ان تدخل بها اليه ؟؟

استغفر الله العظيم يارب .. اتمنى ؟؟ على اساس انى رايح رحلة السبع موانى مثلا ولا هقضى شهر باريس...

عموما لو داخل داخل اختار قضية دفاع عن الحق ايا كان شكله

منذ متى اكتشفت نفسك

بجد لسه بكتشف فى نفسى . ولما اخلص اكتشافات اكيد هستغل اللى اكتشفته فى اى حاجه مفيده

على مفترق طرق الافتتان اليمنى تقول (الى حلمك) واليسرى تقول (الى مالم يحلم به البشر) اى الطرق ستسلك؟

اختار الى مالم يحلم به البشر ده لو كان شىء حلو . اما لو شىء مش حلو هختار حلمى طبعا

نحن لانعيش حياتنا بل نتعلم فيها كيف نعيش . ما تعليقك

طول ماحنا عايش لازم نتعلم من تجاربنا ومن تجارب الغير ومن اخطائنا عشان نعرف نعيش بأحسن الطرق وافضل شكل من اشكال الانسانيه والا ملهاش لازمه العيشه اصلا

بجمله واحده فقط اكتب تعريفا لكل كلمه من الكلمات التايه

الوطن .. استقرار .. بس ده حلم

الام .... الراحه , المرواح , الاكسجين , الطبيعه

الليل .. هدوء وروقان ومش حر

الحب .. اجمل شىء

امريكا .. شيكا بيكا

المرأه .. طب ليه الاحراج ده ؟؟ نص المجتمع ((والحته الطريه اللى بترطب الحياه)) وشىء اساسى فى الدنيا وهيا توتا

الصمت .. احيانا بيكون احسن من الكلام

الانترنت .. خلى الكره الارضيه شبه السوبر ماركت الصغير .. مكان صغير فيه كل حاجه

اختر منصبا واتخذ قرار

بجد سؤال صعب .. بس ممكن اكون وزير سياحه مثلا والقرار اللى هقرره بدون نقاش هوا تجميل المدن والاماكن المهمه البارزه على ايدى فنانين سواء معماريين او مصممين او موسيقيين او تشكيليين . وبكده هتكون بلدنا احلى بلد واغلب الفآت هتشتغل سواء الفنانين اللى عندهم افكار حلوه والشباب اللى عندهم طاقات مش عارفين يستغلوها . وبكده الدنيا هتنتعش وهتكون نضيفه وجميله

قيس , عنتره , جميل .. هم اللذين يقولون شعرا وليلى وعبله وعزه (صموت) لماذا هذا التغيب للمرأه؟

لالالالا المرأه موجوده فى كل حته وفى كل المجالات بس مكانتش زمان واخده حقها زى دلوقتى

ان تكون مطلوبا لأرتكابك جريمه خير لك من ان لا تكون مطلوبا مطلقا . هل تتفق مع هذه العباره ؟ علل ؟

لا اتفق معاها طبعا .. انا مبحبش وجع الدماغ ومحبش اكون مطلوب فى حاجه وحشه. وافضل اكون مطلوب فى حاجه حلوه مش جريمه يعنى

الى اين تمضى كلمات الحب بعد ان تقولها ؟

بتروح للطرف التانى طبعا وهوا حر بأه فيها .. يخزنها يحوشها يرد عليها يطنشها .. واهو كله بثوابه يا معلم

هل تجد علاقه بشكل او بآخر بين المرأه وقطاع الطرق ؟

ده فيه شبه كبير جدا جدا بينهم . الاتنين بيسرقوا . قطاع الطرق بتسرق الفلوس والمرأه بتسرق النفوس . بل المرأه اخطر لما تتسرق من قطاع الطريق بتكون مره ولا مرتين وتعدى واللى بيتسرق حاجات ماديه فقط انما لما تتسرق من المرأه بتكون سرقه ابديه والمسروقات مش ماديه بس

هذا فرق بينى وبينك . متى ولمن تقولها ؟

بقولها لما بيكون الشخص اللى بيتناقش معايا مصر انه صح وانى لازم اكون مثله عشان هوا ده الصح من وجهة نظره طبعا . بقوله اوكى هوا ده الفرق بينى وبينك وانتا صح طبعا بس انا حر فى حياتى عشان اكبر دماغى منه واخلص من وجع الدماغ بدرى بدرى .

كيف هو غدا ؟؟

الله اعلم . بس انشاء الله احسن من النهارده

امرر التاج لمين ؟

لالالا انا مش هديه لحد . اللى عايز ياخده من نفسه يتوكل على الله بالهنا والشفا

نفسى اعرف مين اللى اخترع التاج ده ... هاكله بسنانى .. بس مقدرش ازعل سالى طبعا .

هناك 29 تعليقًا:

Empress appy يقول...

وتفتكر لو لغيت كل الحروف مش هيتخانقوا وحياتك ليضربوا بعض بعصايه الاستيك واللولى بوب
حمد لله على السلامه يا فنان

الست فرويد يقول...

تعيش وتاخد غيرها يا مدون :)

علشان تحرم تكون معدى بالصدفة
وتكتشف اى حاجة حتى لو كانت بلوج

الفضول قتل القطة:)

تحياتى لك

الـسـيـدة نـون يقول...

اسمها الحادثة وليس الحادسة

روح صلحها بسرعة علشان انا بيركبنى العصبى لما اشوف غلطة لغوية


التاج ده منيل بستين نيلة
واسئلته رخمة ومكلكعة رغم ان جواها فكرة
واللى عمل التاج ده اكيد واحد مهيس او محشش

اللى عاجبنى بقى انك قدرت تفهم التاج وتفك شفرته وتجاوب عليه

طـائر الليــل الحـزين يقول...

زى عادتك
على الرغم من قلة اجاباتك
الا انها فى منتهى البساطة والجمال
تحياااااااتى
وكل تاج وانت طيب

حاجات جوايا يقول...

تسلم يا فنان على قبول التاج وإجابته

عجبنى اوى تعريفك للمرأة
ربنا يخليلك توتا يارب ويخليك لها

وعجبنى كمان تعريف الانترنت
فعلا زى السوبر ماركت

ويارب تمسك وزير السياحة يارب
خلى البلد تنضف
المهم وقتها تلاقى ميزانية تحقق بيه اللى بتتمناه

:)

تحيتى واحترامى

أبو العريف يقول...

عتلم
حمدالله عالسلامه
جميله قوي الصوره

والاجمل التاج اجاباتك
المختلفه

تحياتي يا مان
ما تغيبش

عاشقه الرومانسيه يقول...

تاج يفوت ولا حد يموت
تعيش وتجاوب تاجات
هابقى ابعت لك واحد حلو كده اول ما يجينى
وربنا يكتر الحبايب اللى بيبعتوا التاجات دى

yoyo يقول...

صباحك سكر
حمد لله على السلامة يا بن بلدى
كان لك وحشة بجد
مش تغيب عنا تانى بقى

يالا كل تاج وانت بالف خير يارب
اجابتك حلوة اوى فيها بساطة رغم ان التاج فيه فكر و محتاج مخمخة بس على مين بقى انت ادها يا كبير

طبعا هو فى حياة من غيرنا احنا يا ستات ربنا يخلى لك توتا يارب ومش يحرمكوا من بعض ابدا ابدا

اختيارك للصورة حلو اوى
مش تغيب عنا تانى بقى
يارب دايما منور مدونتك ومنور كل المدونات
تحياتى
يويو

محمد عتلم يقول...

آبى هانم بتنجانى
هوا منتج اللولى بوب لسه موجود ؟؟ ده من زمان أوى يا بتنجانى . ولا انا عشان مش عايش فى مصر ومش متابع اللولى بوب و بمبم والكلام الجامد ده
عموما الله يسلمك يا آبى ونورتى

محمد عتلم يقول...

الست فرويد
اول زياره ليكى هنا
شرفتينى طبعا ونورتى البلوج ياست فرويد ... وفعلا والنبى حرمت اكون معدى بالصدفه فى اى مكان وادخل واحشر مناخيرى فى اى حاجه .. ودى جزات اللى مايسمعش كلام ماما
تحياتى ليكى يا فرويد

محمد عتلم يقول...

خيخه اوى
والنبى انتى خيخه
اولا طبعا انا عارف انها حادثه مش حادسه بالثاء مش بالسين ومش بالتقليه حتى .. ماهى بتتنطق كده بالعاميه وألا قلت بالعربيه الفصحى اين كنت وقت وقوع الحادثه ؟؟ انما بالبلدى كنت فين ساعة الحادسه . خيخه خيخه يعنى
بس بجد بجد فعلا رأيك مزبوط انا اللى عامل التاج ده كان مهيس ومحشش وضارب سجارتين بانجو كمان .. بجد تاج متعب اوى
نورتينى يا خيخه وسلمى على شريف

محمد عتلم يقول...

طائر الليل الحزين
ازيك ؟ احسن حاجه فى الدنيا البساطه مع انى رغيت كتير فى الاجابات على التاج
نورتى وتحياتى ليكى

محمد عتلم يقول...

حاجات جوايا ... استاذه سالى
كده برضه ياسالى ؟؟ تخبطينى بالتاج الصعب ده ؟؟ ينفع تعملى كده مع اصدقائك ؟؟ وانا اللى كنت بقول عليكى حنينه . ماشى ماشى
بس بجد تاج حلو وصعب وفيه افكار كتير ومعانى كتير اوى . وكل تاج وانتى طيبه يا سالى

محمد عتلم يقول...

ابو العريف
ازيك ياعم الطهقان والارفان من العيشه والمكيف والمروحه ونقط الميه اللى عامله فلم رعب من الافلام العربى العبيطه .... شفت ياعم التاج العجيب ده واللى عملته فيا سالى ؟ عاجبك كده صاحبك يتبهدل البهدله دى ؟ انا كنت هديك التاج ده بس لما دخلت عندك ولقيتك مشغل فيلم رعب قلت الواد يا اما ضرب يا اما لحس يا اما لسع والله اعلم .. ولا تلاتين تاج هيحوقو فيك يا معلم .. اخبار الفياضانات عندك ايه ؟؟

محمد عتلم يقول...

عاشقة الرومانسيه
ازيك يا دودو وعامله ايه ؟؟
والنبى يا شيخه كفايه تاجات بأه احسن الواحد حس ان دماغه اتقلوظت من كتر لبس التاجات ..
اخبار القطه بتاعتك ايه ؟؟

محمد عتلم يقول...

يويو .. بنت بلدى الجدعه
مرسى يا يويو جدا جدا على سؤالك عنى فى الفتره اللى فاتت . ومش هغيب تانى انشاء الله . بس انا كان غصب عنى والله عشان كنت مزنوء فى الشغل اوى بس الحمد لله خلاص فضيت .. بس مش اوى عشان لسه فيه شغل كتير عندى لسه ماخلصش
واكيد زى ماقلتى ان الحياه من غيركم يا ستات والنعمه ولا تسوى 75 قرش شلنات وبرايز
تحياتى ليكى يا يويو وشكرا ليكى

اقصوصه يقول...

مبروك التاج

اجابات جميله :)

بـِصَمتـِـ أميرة ــــى يقول...

ههههههههههههه
جالى التاج ياعتلم قبلك
سالى اصلها صديقة لتشيفه وبتحب توجب مع صحابها
وانت ماشاء الله عليك
متظبط تيجان
اتبسطت اوى وانا بقرا التاج ده

تقبل مرورى
ملكة بحجابى

محمد عتلم يقول...

اقصوصه
الله يبارك فيكى
عقبالك

محمد عتلم يقول...

ملكه بحجابى
سالى دى محدش يقدر يزعلها وهيا فعلا صديقه لتشيفه على رأيك
وبعدين انا اتدبس فى التاج وانتو تكونو مبسوطين ؟؟ ماشى ماشى
ياشماتة ابله طازه فيا
نورتى يا ملكه

بـِصَمتـِـ أميرة ــــى يقول...

صباح الفل ياعتلم

سبهللة يقول...

اول مرة ادخل هنا
عجبنى البوست اجاباتك هاياة
وشدنى انك خريج فنون
انا خريجة فنون تطبيقية جامعة حلوان دفعة 1999
ياترى كنا دفعة واحدة ؟؟

فكرة من الزمن ده يقول...

حمدالله على سلامتك نورت من تاني
واسفة اني اتاخرت ظروف وجوابات بقى ربنا مايعيدها

تاني تاج واجاباتك حقيقي هايلة ولسة فاكرة اجاباتك على التاج الاول
كمان مميزة وبتعبر عن شخصية الفنان المتميز

واكتر رد ضحكني

لما تتسرق من المرأه بتكون سرقه ابديه والمسروقات مش ماديه بس


واضح انك مسروق ومتقلب اول باول ماديا ومعنويا ههههههههه ربنا يقلبك كمان وكمان ياسيدي
تحياتي يافنان

Bola 7elmi يقول...

.....

.
بس ايه هتلغي الحروف كلها .. والناس تمشي تقول أ طيب سيب الياء كمان .. عشان لو بينادي على حد بعيد يقولو
يـ أ


>> مبسوطه اني مريت ببلوجك ومعرفش وصلتلو ازااي
بس الاكيد انو انشالله مش هيبقى الاخير

وسلاامي ليك :)

محمد عتلم يقول...

سبهلله
اسمك سبهلله ؟؟ يعنى مش فارقه وخليها على الله وزى ماتيجى .. مش كده ؟؟ ياااااااابختك
عموما نورتى البلوج بزيارتك الجميله وارجو انها متكونش اخر مره
انا عموما المفروض اكون دفعة 96-97 بس باظت منى شويه وبقيت دفعة 2002 ازاى معرفش ؟؟ تقريبا راحت عليا نومه يا سبهلله ..
تحياتى ليكى

محمد عتلم يقول...

فكره من الزمن ده
الله يسلمك يا باشا وكل تاج وانتى طيبه
الظاهر انك عارفه احنا بنتقلب ازاى منكم وبنكون مبسوطين واحنا بنتقلب كمان .. ربنا..... يخليكو لينا يا رب
وحسبى الله ونعم الوكيل

محمد عتلم يقول...

بولا حلمى
لالالا انا هسيب ال أ بس ممكن اعملك انتى حاله استثنائيه عشان انتى اول زياره ليكى هنا
عموما نورتى البلوج واعتبرى البيت بيتك من هنا ورايح يا باشا
تحياتى ليكى

غير معرف يقول...

هو فعلا تاج عجيب غريب مريب

هههههههههههههه

-------------

دي اول مره ادخل فيها البلوج بس عجبني اوي
وعجبتني الصور اوي

بجد انت فنان

محمد عتلم يقول...

هاجر زعبل
اول مره تشرفينى فى المدونه ... نورتيها طبعا
شكرا ليكى جدا والحمد لله ان المدونه بتاعتى عجبتك وياريت ماتكونش اخر زياره هنا ..
تحياتى ليكى