الأربعاء، أبريل 08، 2009

عتلم





















ازيكم يا جماعه
انا جالى من فتره اللهم احفظنا بعيد عن السامعين تاج
من سيادة الزميل المبجل ابو العريف.. وانا وعدتكم
فى البوست اللى فات انى اجاوب على اسئلته طبعا وانا
مزنوق زنقه منيله عشان انا مش من النوع اللى بيعرف
يتكلم .. بس لقيت تعليقات لناس شكلهم مصرين يعرفوا
الاجابات وعنيهم بتطلع شرار .. بصراحه انا خفت منهم
فقررت اجاوب النهارده على التاج ولينا رب اسمه كريم
بس اللى عايز يشوفنى كويس يتبع الاتى :
فى الرسمه العجيبه دى هتلاقى نقطه صغيره حمرا فى نص الرسمه بالظبط .. ركز فيها اوى اوى لمدة دقيقه وحده بس يعنى ممكن تعد لغاية خمسين او ستين ثانيه . وبعدين غمض عنيك وركز فى الضلمه هتشوفنى كويس اوى
نبتدى التاج .. بسم الله
ــــــــــــــــــــــــــــــــــــــــــــــــــــــــــــــــــــــــــــ
اسمك ؟
محمد عتلم

الأسم المشهور بيه وسط اصحابك ؟
عتلم

سنك؟
33سنه وحته صغبره قيمة شهر ونص كده

مجال دراستك ؟
التصوير والكمبيوتر

اسم مدونتك ؟
Life Is Life (الحياه هى الحياه)

الصوره الرمزيه لمدونتك بتعبر عن ايه ؟
بصراحه ده منظر من المناظر اللى بتطل عليه غرفة النوم الخاصه بتاعتى
فى وقت الشروق . فى بيتى اللى فى مصر(طنطا بالتحديد) وانا طول عمرى
بحب المنظر ده وطول اليوم بيختلف الوانه طبعا حسب التوقيت يعنى الصبح
غير العصر غير المغرب وهكذا . وطبعا كل وقت ليه جماله وروعته
وفيه كمان مناظر تانيه بشوفها من الغرفه ومن البلكونه بتاعتى تحفه وتجنن
انشاء الله هعرضها لكم . وعلى فكره فيكم مين يكتم السر ؟؟
المكان ده من احب الاماكن على قلبى عشان ده بيت ابويا وامى الله يرحمهم
وفيه كمان ذكريات حلوه كتير جدا والبيت ده اصلا فى بلدنا اللى هيا عباره عن عيلتنا
يعنى البلد كلها بيتنا وبحب كل حاجه فيها . وكان فيها اخويا حاتم عتلم واختى حنان عتلم
برضه الله يرحمهم . وكنت بحبهم اوى . مع انى معملتش اقامه كامله فى البيت ده فتره طويله
بس طول ما انا فى مصر او فى طنطا بالتحديد كنت لازم اروح البيت ده كل يوم ويمكن اكتر
من مره فى اليوم .. وكل اصحابى واصحاب اخواتى واصحاب اصحابى كانو بيروحو
للبيت ده معايا . لدرجة انى بعد ماسبت مصر كلها كان فيه بعض من اصحابى بيروحو
هناك من غيرى عشان المكان هناك والبيت جميل اوى . وعلى فكره كمان جنسيات
كتير اوى من اصحابنا كانو لما ييجو مصر كانو لازم يعملو اجازه كام يوم عندنا
عشان الراحه النفسيه اللى بيحسو بيها هناك . ده غير ان فيه فنانين عالميين راحو هناك
والصوره كامله موجوده فى المدونه تحت بأسم صباح الخير
اما الصوره الرمزيه دى صورتى الشخصيه وانا اللى مصورها لنفسى . اى خدمه

هل فكرت فى اغلاق المدونه ... والسبب ؟
لسه مفكرتش انى اقفش عليها .. ممكن اعملها شكل جديد بس ماقفلهاش الا اذا

ايه رد فعلك لو حد قل ادبه عليك فى تعليق ؟
معتقدش انه ممكن يحصل . اصل المدونه كلها صور يعنى مش بناقش مواضيع ولا
بتكلم فى سياسه او دين او حتى مواضيع اسريه تثير اى جدل او تسيب وراها
اسئله او انتقادات . انا بقدم لكم صور فنيه بس برؤيه شخصيه زى ما انا شايفها

اسوأ مدونه ؟
الحقيقه فيه مدونات كتير منيله بنيله انا شايف انها بتقدم لا شىء وعاملين زى البغبغانات
بيقولو رأيهم اللى سمعوه من اى شخص وبما ان الشخص ده مؤثر شويه عليهم فهما
مقتنعين ان هوا ده الصح وفيه ناس تانيه عماله تتكلم فى حاجات اكبر من سنهم وخبرتهم
ومبيكونش لايق عليهم . وناس تانيه ايديهم فى الميه البارده وبيتكلمو عن الايدين اللى
فى الميه السخنه . كل ده عشان المدون يقولنا ان هوا واد فتك وجامد وفاهم ومثقف
وهوا طبعا فى طراطير الطراوه

هيحصل ايه للايميل بتاعك لما تموت ؟
ولا اعرف .. لما اموت هاجيلكم فى المنام واقولكم ايه اللى حصل

اديت الباسوورد بتاعك لحد ؟
اديته لمراتى عشان اى ظرف من الظروف .. الواحد مش ضامن عمره

السفر بالنسبه لك ايه ؟
عايش طول عمرى فى سفر .. لدرجة انى احيانا بركب الطياره مرتين فى اليوم
الاول كنت بسافر كتير فسح .. استكشاف اماكن .. دلوفتى بسافر كتير بس شغل
السفر ليه مميزات واهمها التغيير والاكتشاف والتجديد وتوسيع الخبرات
وليه عيوب زى انه بيعودك على الوحده على المدى البعيد

المود بتاعك ؟
متقلب المزاج بس هادى مش عصبى . صبور بمزاجى . كتوم . بفكر كتير
بكبر دماغى كتير برضه بمزاجى . مش من النوع اللى بيجامل او ينافق .
بحب اصور والعب مزيكا .

يتعمل ايه فى وقت فراغك ؟
بقضيه فى التأمل او مشاهدة حفلات روك وجاز وبلوز وكلاسيك
او بخترع اى حاجه فى البيت .. اضاءه . برواز . اى حاجه فى البيت

الاكله المفضله ؟
الحمام . الفته . الضانى المشوى . البفتيك . صينية بطاطس فى الفرن
الخضار بجميع انواعه . الستيك على الجريل . كفايه بأه انا جعت

الصفات اللتى ورثتها عن والدك ؟
تكبير الدماغ واحترام النفس والناس والطيبه وعرفت ازاى اروق وازبط نفسى

الصفات اللى ورثتها عن والدتك
الفن والاحترام والطموح والطيبه برضه .. الاتنين كانو طيبين اوى ومحترمين اوى

اكتر 6 حاجات بتكرهها
الظلم . الاستغلال . النفاق . الاشتغالات . الضغط . النكد

اكتر 6 حاجات بتحبها
اهلي وتوتا . المزيكا . التصوير . التأمل . الهدوء . الفن والديكور

شخصيتك نوعها ايه ؟
الحمد لله شخصيتى قويه نوعا ما بس مش اللى هيا تزهق او تضايق حد ومن الشخصيات الملتزمه
بكلمتها وجدع مع الناس دايما

لماذا دخلت عالم التدوين ؟
عشان عندى حاجات لازم تطلع للناس والناس تقولى رأيها وكمان اكيد هلاقى اصدقاء كويسين
وكمان كنوع من انواع تبادل الثقافات

اجمل كلمه اتقالت فى وصف مدونتك؟
بصراحه فيه ناس كتير اوى كتر خيرهم رافعين من روحى المعنويه وبيقولولى كلام حلو اوى
مش عارف دى مجامله ولا بيشتغلونى ولا ايه بالظبط

اهمية التعليق بالنسبه اليك
لو مفيش تعليق تبقى الصور ملهاش لازمه اصلا

احسن بوست كتبته
مع انى مش باكتب اساسا ومدونتى كلها خاصه بالصور هاعتبر السؤال هو:
احسن صوره صورتها
مش قادر اقرر ... كل صوره ليها موود وطابع وطعم مختلف لوحدها . ولو حد شايف حاجه تانيه
ياريت يقولى ويفطمنى . انتو المشاهدين وانتو اللى تقدرو تحكموا اكتر منى فى الحاجه دى علشان
كده انا عملت استفتاء عن نوعية الصور المفضله هتلاقوه على اديكم اليمين . ياريت اعرف رأيكم

افضل بوست قرأته ؟
بحب اقرا البوستات اللى فيها فن او يكون فيها معلومات مفيده ايا كان نوعها وبحب البوستات الصادقه
فى احساسها انما البوستات اللوكلوك لوكلوك عمال على بطال دى فكك منها . وبحب البوستات الكوميديه
والحاجات السهله اللى فى الصميم

تمرر التاج لميــــــــن لميـــــــــــن لميـــــــــــــــن ... لمين يا عتلم ؟؟؟؟
للصديقه الجميله ساره ربيع صاحبة مدونة نبضات
http://sararabie.blogspot.com/




هناك 49 تعليقًا:

حاجات جوايا يقول...

هههههههههههههههه
اولا بالنسبة للصورة .. أنا كنت فكراها اشتغالة
بس سبحان الله لما تركز الصورة بتتحمض لوحدها
حتى فيك شبه من هشام عباس
ههههههههههههههه


--------------------

وعرفت ازاى اروق وازبط نفسى
............
الطريقة من فضلك !!!!!!!!!!!




عالم التدوين نور بوجودك أخى الفاضل
مبروك عالتاج

وكل مرة وانت طيب

خالص ودى
سالى

ريمان يقول...

ايوة كده

سمعت الكلام وجاوبت ع التاج

جميل والله عشان اتعرفنا عليك اكتر واكتر

ربنا يحقق لك كل ما تتمناه

وباين عليك شخصيه جميله

ونفسى ابقى زيك واكبر دماغى

ههههههههههههههههه


تحياتى ليك

mohamed ghalia يقول...

جميلة بجد إجاباتك
ومبروك عليك التاج

نـــــور يقول...

ايه اللماضه دى ياعتلم؟
تصدق عرفت تسرح بيا فى موضوع النقطه الحمرا دى :)

كنت متوقعاك بالظبط زى ماانت قلت فى كلامك فى كل حاجة على فكره

انما بخصوص المدونات اقدراعتبر بما انكمشمن زوار مدونتى انها واحده من النوعيات البشيعه الشنيعه اللى انت مش بتحبها ؟!

سلام وكل تاج وانت وابو العريف طيبين

نـــــور يقول...

بخصوص سؤالك على تعليقى اللى فات

اللى تعبنى اللون الاسود اوالبنى الغامق
حسيته حاجه يمكن من سخط الطبيعه
رعبتنى اوى وقبضت قلبى
بس

عاشقه الرومانسيه يقول...

حلو قوى التاج ده لانه خلاك المره دى
تتكلم بدل ما تصور ولو ان الصوره بتاعتك تحفه
ركزت فيها ولقيتها بجد كانى شيفاها
وكل شويه ارجع للمدونه واركز واغمض اركز واغمض وهكذا
هههههههههههههههههههه
تسلم ايدك
عملتها ازاى دى؟؟؟؟؟؟؟؟؟

أبو العريف يقول...

باشا
ضرب نار بقي وحاجات من اللي هي
بتفرقع دي
احييك علي اجابتك
شخصيتك زي ما بتعكسها صورك
فنان حساس
بيحب الطبيعه
( وهي كمان بتحبه )
اما بقي بخصوص المدونات اللي هي رغي اللي انت ما بتحبهاش دي
طب خلي الكلام دا في سرك
دانت كنت ناقص تقولي انت يا ابو العريف
اللي كل كلامك رغي وما فيش منه فايده
دا كله عشان انا اللي دبستك في التاج
ماشي ياعم الحج

كمان بتحب البطاطس اللي هي في الفرن
دانت بتغيظني بقي عشان معرفتش اعملها

تحيلتي ليك يا باش وكل تاج وانت طيب

sara rabie يقول...

يعنى وكمان بتطلعلى فى الضلمة يا عتلم...!
يا لهوووووووي

اغمض اشوفك :)
يا دى الهنا يا دي السعد

حسبى الله ونعمه الوكيل فيك يا فخرى

يا عم انا عملت لك ايه علشان تحدفنى تاج؟

ده انا طيبة واميرررررررررة

هجاوب..بس زى ما قلت عندى
سيبنى اكون نفسي ههههه

سلامات

Gannah يقول...

مدونتك بالتأكيد متميزة لانك ممكن بالصورة تقول حاجات كتير وفى نفس الوقت كل واحد بيفهمها على حسب شخصيته وخلفيته وتذوقه
يعنى انت بعيد خالص عن اللوك لوك (الرغى يعنى) صح؟ المعنى كده
احلى صورة الحرم النبوى بدون منافس طبعا
تحياتى

طـائر الليــل الحـزين يقول...

محمد عتلم
اجابات جميلة يا فنان
وفعلا شكلك هادى من طريقة كلامك
وعاجبنى جداااا كلامك عن بيت ابوك وامك
وانك بتشوف وبتحس فيه بكل اللى انت قولته
بجد اجابات حلوة
وبدل على شخصية فعلا جديرة بالأحترام
تحيااااااااااتى

محمد عتلم يقول...

حاجات جوايا .... سالى
حلوه اوى الصوره بتتحمض لوحدها دى على اساس ان المخ ستوديو ومعمل
انما بالنسبه للترويق والتزبيط دى ملكه وموهبه بتكون موجوده جوا الانسان فى الجينات الوراثيه
بس عالم التدوين منور باصحابه يا سالى وكفايه انك بتكتبى فيه شموع مضيئه يا باشا

محمد عتلم يقول...

ريمان
ازيك يا ريمان ؟
هوا انا اقدر مسمعش الكلام برضه ؟؟ دانتو تقطعونى حتت حتت
انتى كمان شخصيه جميله بجد
بس متحاوليش تكبرى دماغك انتى كمان عشان لو كلنا كبرنا دماغنا الدنيا هتبوظ خليكى انتى عاقله والنبى وكفايه احنا

محمد عتلم يقول...

mohamed Ghalia
الله يبارك فيك يابو حميد
انتا محسسنى انى جاوبت فى الامتحانات ونجحت فى الاعداديه
شكرا ليك على زياراتك

محمد عتلم يقول...

نوووووووووور
انا لمض يا نور ؟؟؟
ماشى ماشى ..
لالالالا ازعل منك يانور اوى .. ازاى تقولى انى مش من زوار مدونتك ؟؟ طب اديكى اماره واخلى وشك يحمر كمان ؟؟ انا علقت عندك فى بوست فلتبحث عن نفسك
وانتى اللى مش بتردى على التعليقات يا نور مش كده ؟؟ وكمان بأمارة البوست الجديد اللى لسه هعلق عليه ... حد يقول مره من المرارير برضه ؟؟ مين بأه اللى لمض ؟
نور ... المدونه اللى مش بتعجبنى مبعلقش فيها من اساسه علشان وجع الدماغ , انتى مدونتك حلوه

محمد عتلم يقول...

عاشقة الرومانسيه
بما انى مش من النوع اللى بيكتب فمينفعش انى اعمل تاج كلام بس لازم احطلكم صوره برضه بس المره دى قلت اغلس واحطلكم صورتى بس متغمضيش وتفتحى وتشوفيها كتير احسن تحولى
بش انتى شفتينى بجد مش كده ؟ ده بأه سر المهنه بس عمايلها محتاج صوره عاديه وفوتوشوب وشوية تخيلات وتركيز شويه

محمد عتلم يقول...

ابو العريف
دنا هسلقك يابو العريف على التدبيسه دى .. اديك عرفتنى وشفتنى كمان . ولا انتا مشفتنيش ولا شفت صينية بطاطس ولا ايه ؟
وبعدين انتا هتجيبلى مصيبه وتطلعنا انا والطبيعه بنحب بعض ؟ عيب كده انا راجل متجوز ولا انتا عايز مراتى تخلينى اقطع علاقتى بالطبيعه ولا ايه ؟؟
فساده من يومك
وبعدين انا مش من النوع المجامل يعنى لو مدونتك مش حلوه والله ماكنت زرتك ولا علقت على حاجه عندك من الاساس . انتا فنان برضه ورسام ودى لوحدها مصيبه توديك حائل

محمد عتلم يقول...

ساره ربيع
عارفه لو التكنولوجيا كانت اعلى من كده كنت طلعتلك فى الضلمه وقلتلك بخخخخخخخخخخخخ عوووووووووو
وكنت هخليكى تكلمى نفسك وتكرهى كل ماهو عتلم والله عتلم
وعلشان انتى طيبه وجميله وكلنا بنحبك هنديكى فتره سماح كام يوم وتشحنى اقصد تجاوبى على التاج ولو اتأخرتى هنقطع عنك الحراره وهيكون فيه غرامات وشكاوى بأه ومشاوير للسنترال ومش بعيد يكون فيه حبس يا معلم

محمد عتلم يقول...

جنه
انتى قلتى حاجه طبعا 100% صح
ان كل واحد بيشوف الصوره او بيشوف اى عمل فنى وبيفسره ويفهمه حسب شخصيته وتعليمه وتربيته كمان
ويبان هنا اختلاف الثقافات طبعا من مشاهد لمشاهد تانى
انما لوكلوك عن لوكلوك يفرق طبعا
فيه كلام فارغ ملوش لازمه وفيه كلام مليان ليه الف لازمه وفيه كلمه وحده ابرك من جرنان زى ما بيتقال برضه
يعنى كلمه ممكن تحدد مصير بلد بحالها مش كده ولا ايه ؟؟ وممكن تنجح او تخسر انسان
ومرسى ليكى ان صورة الحرم النبوى عجبتك وده يدل انك متذوقه جميله للفن

محمد عتلم يقول...

طائر الليل الحزين
شكرا ليكى على الكلام الجميل وده من ذوقك طبعا
وميغركيش الهدوء ده . لما بتفلت منى مبعرفش المها وحياتك الدنيا بتبوظ وببقى شرير اوى بس مش مع الناس كلها طبعا
تحياتى ليكى يا طائر الليل الحزين اللى نفسى بأه يكون طائر الليل السعيد

فكرة من الزمن ده يقول...
أزال المؤلف هذا التعليق.
فكرة من الزمن ده يقول...

اجاباتك صادقة وتلقائية وبدون اي رتوش
مبروك التاج وفعلا ده تاج وداير علينا كلنا
وحقيقي
سعيدة بزيارتي لمدونة فنان حقيقي زي اللي بنقرا عنهم في الروايات
والصورة جميلة فكرتها
وعدى عليا صور قبل كده
بس مع شديد احترامي لحضرتك وتقديري
انا مش عايزة لما اغمض اشوفك تاني انا عايزة اشوف حبيبي
فلو فيها رزالة ممكن تعرفني ازاي ممكن اعمل صورة كده لحبيبي
علشان لما اغمض عيني اشوفه
ولا اسرار المهنة صعب تطلع للناس؟
عموما سواء طلعت الاسرار او لا..

اسجل احترامي وتقديري وتحياتي

بنت الغربة يقول...

ايه تكبيير الدماغ ده كله ياعم عتلم..؟؟؟
بس بجد ردود قويه وظريفه فى نفس الوقت..
وانت اول واحد اعرفه مدى الباسوورد بتاعه لمراته...؟؟؟؟
ماشى ياعم ..يابختها بيك ..(اللهم لاحسد)..
تحياتى ليك ولمراتك الاموره

محمد عتلم يقول...

فكره من الزمن ده
الله يبارك فيكى وعقبالك
ومرسى على الكلام الجميل ده
وبالنسبه للصوره ... اولا تحولى الصوره لنيجاتيف وتحددى نقطه فى نص الصوره بالطول والعرض طبعا وتبصيلها كتير
وتغمضى عينك بعدها تلاقيها انطبعت فى خيالك على طول... هيا سهله جدا
حاولى تعمليها وقوليلى ايه الاخبار
وشكرا على الزياره

محمد عتلم يقول...

بنت الغربه
شفتى تكبير الدماغ ده ؟؟ مش اى حد برضه
والله انا مكلف الجمجمه دى كتير اوى لحد ماوصلت للمرحله دى
وبعدين انا مدى الباسوورد لمراتى عشان انا مش من النوع اللى بيخبى اى حاجه حنى لو غلط . وسايبها على الله
انتى لسه مستجمه ومأجزه فى البيت ولا اشتغلتى تانى ؟ طمنينى

الـسـيـدة نـون يقول...

غريبة اوى حكاية النقطة الحمرا دى
انا ركزت حوالى عشرين ثانية وكبرت دماغى
بس لاقيتك فعلا بتطل على من مدونتك
انا اتخضيت بصراحة

بس برضه انا بحب خداع البصر ده


ليه عامل خلفية مدونتك اسود
رغم انه لون انا بحبه جدا
بس حسيت اول ما دخلت ان فيه حد طفى النور

الهى ربنا يخليك يا عتلم
ولع النور تانى


اجاباتك عن التاج شوقتنى لحاجة واحدة بس
انى اروح بيتكم اللى فى طنطا واقعد فيه كام يوم
حسيت من كلامك عنه ان هو ده المكان اللى ممكن اهرب فيه من الناس ومن كل حاجة


انت عرفت توصف شخصيتك صح
رغم انى ماشوفتكش ولا اعرفكش غير من مدونتك
بس حسيت فيك كدة فعلا


البوست بتاع شمس وغيوم
الصورة خطيرة


اقولك على حاجة
بص فوق الشمس علطول
هتلاقى صورة جمجمة
وممكن تشوفها صورة راجل لابس نضارة سودا
انا شوفت حصان وشوفت دولفن

وشوفت وش واحدة نايمة على الرمل

الصورة ممكن تشوف فيها حاجات كتير
لو ركزت فيها هتشوف حاجات غريبة اوى


اديت الباس ورد بتاعتك لمراتك
!!!!!!!!!!!!!!!!!!!!!!

عملتها ازاى دى؟

احييك على شجاعتك الزوجية




سلام يا عتلم
اختك خيخة

محمد عتلم يقول...

خيخه
اربعتلاف سلامه عليكى من الخضه يا نوران
وبعدين الاسود ده احلى لون فى الدنيا بيليق عليه كل حاجه واى لون يمشى معاه
وكمان يمشى خلفيه حلوه على كل الصور سواء الوان او ابيض واسود وانا عن نفسى بحب الاسود عشان انا بصور ابيض واسود كتير بس مبحبش الاسود فى الحياه طبعا فاهمانى... اما صورة الجمجمه بصراحه انا مكنتش شايفها بس لما ركزت شفتها جدا ... دانتى اروبه اوى وساعات سوسه ... اما الباسوورد بتاعى انا مديه لمراتى من اول ما اتجوزنا عشان انا مش من النوع اللى بيخبى اى حاجه حتى ولو كانت غلط واللى يحصل يحصل .. هيا علقه ولا اكتر هههههههه
بعدين انا حاسس ان الحياه قافشه معاكى اليومين دول شويه مش كده ؟ ممكن تمشى شويه بمقولة نفسى ثم نفسى ثم نفسى ثم طز فى الآخرين ... هترتاحى كتير يا نوران

محمد عتلم يقول...

خيخه
اه صحيح نسيتينى
انتى تشرفى فى البيت اللى فى طنطا فى اى وقت طبعا واعتبريه بيتك وانا اخوكى وطبعا توتا اختك .. البيت ده فعلا مكان اكتر من رائع للهروب النفسى والجسدى والصحى والعقلى عشان ممكن تقعدى فى البلكونه متشوفيش غير سما زرقا وشجر بالوان مختلفه من درجات الاخضر وده على مستوى نظرك .. مفيش قطه معديه .. اخرك عصفوره او حمامه او هدهد . ده غير الهوا النقى جدا والصمت المريح جدا . وانا هنزل بوستات قريب فيها صور المكان ده
وكمان فيروز هناك

الـسـيـدة نـون يقول...

طب وحياتك يا عتلم العنوان بالتفصيل وقولى لما اروح واخبط على الباب
اللى هيفتحلى اقوله ايه؟



رجاء اخير

بلاش نوران

يا تقولى خيخة يا تقولى نورا



سلام
اختك خيخة

محمد عتلم يقول...

خيخه
انتى مبتحبيش اسم نوران ليه ؟
ده على الاقل احسن من خيخه عشان انتى مش خيخه .. عموما ماشى كلامك وهقوللك خيخه
اما بالنسبه للعنوان بتاع البيت ينفع اكتبهولك على الملأ كده؟
انتى عايزه لما تحبى تهربى شويه من الناس يكونو هما عارفين انتى فين عشان العنوان مكتوب كده عينى عينك .. يعمى انا يا جماعه لما اختفى هختفى عند عتلم فى الحته الفلانيه فى المنطقه الفلانيه فى البيت الفلانى . اوعو تقولو لحد على مكانى عشان ده سر هههههههه
عموما دورى على طريقه تانيه ابعتلك فيها العنوان عشان محدش يعرفه
وتروحى هناك وتخبطى وفيروز هيا اللى هتفتحلك . ادخلى عادى وقوليلهم انك من طرف محمد وجايه اقعد كام يوم هنا
والله محدش هيكلمك نص كلمه واعتبرى البيت بيتك ووعد منى اول ماتروحى عندنا فى البلد هاجى ازورك انا وكل المدونين الاعزاء وهجيب شريف وهانى وكل الناس اللى عايزه تهربى منهم عشان انتى متقدريش تعيشى من غيرهم
بس بجد والله انتى تنورى الدنيا كلها مش البيت وبس يا......نورا

Unknown يقول...

تسلم ايدك ياعتلملململموووووووووو
ايه ياعمونا الفن اللى بيفنن ده ؟؟
جميلة اجاباتك ...لأ معلش دى مش اجابات دى لوحااااااااااات
حلوة الحتة اللى فوق دى ؟
طيب ايدك على جوز
جنيهات ولا
لوحتين
تلاتة
هدية؟

محمد عتلم يقول...

norahaty
ايه يا عم الدلع ده ... حلوه والله ياعتلملململموووووووووو دى
جبتيها منين دى ؟
انتى كمان اجاباتك على التاج بتاعك كانت بجد فزيعه فزيعه فزيعه ومفتكسه اوى وتموت من الضحك
وبعدين انتى راسمه على جوز جنيهات بس ؟؟ او لوحتين تلاته ؟؟ المدونه كلها تحت امرك يا دكتوره نانا

Unknown يقول...

السلام عليكم ياعتلملململموووووووووو
يعنى ممكن نبقى نستلف لوحة من الحاجات
الحلوة بتاعتك دى واحطها فى المدونة عندى سواء فى السايد بار فى المدونة
الاساسية (صعبان علىّ حالنا )او احطها كبوست فى المدونة التانية
(وجواباتى اغنياتى وحاجاتى
ومحتاجاتى)مع ذكر ان حضرتك
صاحب الفنننننن الرفيع ده
وذكر اللنك كمان لمدونتك؟

محمد عتلم يقول...

norahaty
ممكن طبعا بس تدفعى جوز جنيهات رهن لغاية ماترجعى الفارغ

روابط يقول...

أجابة نموذجية
انت تستحق عشرة على عشرة

تحياتى

محمد عتلم يقول...

حازم سويلم
شكرا يا باشا وعقبالك

sara rabie يقول...

تصدق دماغى صدعت وانا بجاوب
اييييييييه كل ده

يلا مش خسارة فيك برده

ابنائننا فى الخارج هههههه

سلامات يا عتاليمووووو

فكرة من الزمن ده يقول...

احب اطمن حضرتك
كله تمام
والعملية تمت بنجاح
كنا هنضحي بالام علشان الدكتور يعيش لكن الحمدلله مافيش حد ضحينا بيه
واحتفظت بالصورة الاصلية سليمة
وبعد عدة محاولات نجحت
اشكرك

وسعيدة ان كلامي لحضرتك ما تفهمش غلط ولا بحساسية
اما بالنسبة لعقبالي فلو كانت على التاج
فهو بالفعل وصلني من فترة وجاوبت عليه

واتمنى زيارة حضرتك ورايك فيث المدونة ولو حبيت تقرا التاج

فكرة من الزمن ده يقول...
أزال المؤلف هذا التعليق.
فكرة من الزمن ده يقول...

ملحوظة
لا 2
اولا ده مش اول تعليق ليا عند حضرتك
عجبني كل شغلك وعلقت على صور كوبري استانلي


ثانيا كتير بادخل المدونة دي
فقط علشان اتامل اعمال النحت اللي مكتوب عليها اسم حسام عتلم واكيد من تصوير حضرتك
حقيقي
معجبة بالحاجات دي بشكل غير طبيعي
واتمنى لو تنزلها في بوست لو ينفع احتفظ بيهم عندي حقيقي انا شايفة روائع ونوادر جد جد
ملحوظة اخيرة اؤكد اني موش بجامل وده راي فعلا
تحياتي

إيمان قنديل يقول...

ياترى ياعتلم لما قلت لي لي تعالي اتخضي كان قصدقك ايه


الصوره

والا الكلام


إذا كان الكلام فأنا وجدته ممتع ولذيذ وبيعرفنا على شخصيتك


اذا كانت الصوره فانا موش عارفه ليه فكرتها صورة لينين



أوعى تكون هو

ماهي فيها نقطه حمرا


وثورتهم كانت حمرا برضه

الـسـيـدة نـون يقول...

هاستخبى عند عتلم
وتوتا هتستقبلنى
هتفتح ليا الابواب
وتوصلنى لحد اوضتى
وفيروز بضحكة منها
هانسى كل همومى
وهتيجى تلعب معايا
وهنتفرج على النجوم
من شباك المشربية
وعتلم اخيخ مني
هيجيبلي كل حبايبى
اللى انا هربانة منهم
هيقعدهم فى ارابيزي
ويضحكلى ضحكة خبيثة
ويسبيهم قاعدين معايا
ويهرب هو منهم
والله لا طلع عنيك
يا محمد يا بن عتلم
وهاخليك تاخدلى صورة
تطلعنى فيها مزة
و ورينى بقى شطارتك
وهتعمل ايه كاميرتك
فى وش خيخةالدكر
هاخليك تندم فى يوم
انك لعبت الدنيئة
مع بت اسمها خيخة
ولم يلا اصحابك
وخدهم معاك فى ايدك
واياك تفكر تانى
تقعد حد فى ارابيزى
وسيبنى انا وفيروز
نكمل عد النجوم
من شباك المشربية


والسؤال اللى بيطرح نفسه هنا
الا الارابيز دى تطلع فين كدة يا عتلم؟


سلام
اختك خيخة

yoyo يقول...

صباحك سكر يا بن بلدى

بجد ان سعيدة جدا جدا بزيارتى لمدونتك الرقيقة اللى بتعرف عن انسان رقيق المشاعر و الاحاسيس ( دا مش غزل ولا حاجة عشان المدام بس )هههههههههه
لا بجد مدونتك جميلة جدا
كمان اجابتك حلوة ولوى وعرفتى اكتر عى شخصيتك الجميلة
اهوا تاج علينا حق هنعمل ايه بقى اللى حصل حصل

سعيدة بزيارتك لمدونتى
واتمنى ان يدوم بيناالتواصل
تحياتى
يويو

محمد عتلم يقول...

فكره من الزمن ده
خلاص الحمد لله العمليه تمت بنجاح ؟؟ الف مبروك يا عم والحمد لله مفيش ضحايا ولا خساير ... وانا على فكره زرتك قبل كده وقريت التاج كمان امبارح بس لسه معلقتش .. اما بالنسبه للنحت بتاع حسام عتلم (اخويا الكبير) انا مش مصور كل الحاجات دى .. انا مصور بعض الحاجات وبعضها مش متصور فى مصر عشان هوا مش عايش فى مصر ... وممكن تعملى منهم نسخه ونحتفظى بيهم طبعا
وشكرا ليكى جدا جدا واستنينى عندك قريب فى مدونتك ... حضرى الشاى بالنعناع

محمد عتلم يقول...

غرام
انا كان قصدى اخضك واطلعلك فى الضلمه بالصوره ...
انتى فاكراها لينين ؟؟ لا دى صورة واحد اسمه محمد عتلم مصور هوا وعنده مدونه كلها صور اسمها Life Is Life عارفاه ؟؟
نقطه حمرا وثوره حمرا وطاحونه حمرا على رأى احمد حلمى فى ظرف طارق
عموما نورتى جدا

محمد عتلم يقول...

ساره ربيع
عشان تعرفى ان الكلام على النفس بيجيب مش صداع وبس .... ده بيجيب عته مغولى واستبحس وهسس

محمد عتلم يقول...

خيخه
ايه اللى انتى منيلاه ده يا خيخه ؟؟
كل ده عشان لعبت الدنيئه معاكى ؟؟
عرفتى بأه انى لوحبيت اطلع اخيخ منك اكيد هكون اخيخ حكم الخيخنه دى فن ومش اى حد يعرف يستخيخ . انا بأه ممكن اطلع اخيخ واخيخ واعدى مرحلة الخيخنه بمراحل كتير اوى وانشر القصيده الجامده دى فى بوست لوحدها واحط عليها صورتك اللى يتمناها هانى واسميها :
"البحث عن ورك فرخه فى المحيط" من ديوان خيخه
وعلى فكره انا فعلا معرفش الارابيز دى تطلع فين فى الجته .. بس اعتقد فى منطقة الوجه

محمد عتلم يقول...

يويو
يويو يابنت بلدى
ده مراتى هتقطعك حتت ... بتعاكسينى ؟؟
انتى كمان مدونتك جميله واجاباتك على التاج كانت حلوه اوى
اهلا بيكى فى اى وقت فى المدونه وهزورك كتير انشاء الله يا يويو

بـِصَمتـِـ أميرة ــــى يقول...

ههههههههههههههه
جميل التاج
بداية من الصورة اللى فيها اتراكشن لحد تمريرك للتاج
عرفت عنك كتير ونورت المدونين بتاجك
واعتقد انك انت اللى كرمت التاج
مش هو اللى كرمك
انت اضفتله طعم مختلف

تقبل مرورى
ملكة بحجابى

محمد عتلم يقول...

ملكه بحجابى
ايه الكلام الجامد ده .... متشكر جدا جدا يا ملكه على الكلام اللى مش أده ده وانتو اللى منورينى والله